雖然老早已知道李澤楷不會出席電訊盈科（008）的中期業績記者會，但昨午出席的記者人數也有幾十人，尚算墟冚；會上沒有人再提去年的收購或蘇澤光請辭事件，就連nowTV天價投得英超聯的開支會否大大影響電盈的營業表現，也被行政總裁艾維朗以英超開支屬下半年而沒有入帳為理由，暫時反映唔到。
在悶場之餘，財務總監許漢卿被問到手機補貼時，指PCCWMobile的手機補貼遠低於對手，醒目的記者馬上追問：你知競爭對手的每部手機補貼數額嗎？大家都好奇想知道佢係唔有競爭對手的內幕消息。Susanna Hui回應時只係肯講PCCWMobile每部手機補貼的費用少於一千元，並謂該公司吸引客戶可以用英超，唔一定得手機補貼呢招，言下之意係競爭對手每機要貼一千元以上；咁又係，PCCWMobile零機價的手機大部分係華為，成本價當然係非常低。
而電盈半年純利8.22億元，較去年同期增長3%，nowTV及PCCWMobile業務虧損大幅收窄，中期息派6.5仙；不過且看當下半年英超的直播權入賬之時，半年賺十億八億又夠唔夠找數。
作者：方博誌
(更詳盡專題見Phone雜誌第89期九月一日出版)
http://www.redpoint.com.hk （紅點網誌）
